今次介紹土瓜灣隱世或性價比高嘅美食
呼吸星球 (高質之選)
雜莓果手工雪糕伴自家麻糬窩夫
整份窩夫十分精緻: 首先strawberry ice-cream上面再淋上士多啤梨果醬, 雪糕甜度適中, 旁邊有雜莓&cream, 窩夫面層有些少許沙糖作點綴, 加上精細嘅士多啤梨肉粒, 窩夫食落仍然脆口, 裡面有黑糖麻糬, 口感豐富, 不錯.
Pluto (Mint Latte)
朋友說重薄荷味, Latte就一般
Deluxe Chocolate
賣相與味道一致, 好濃郁朱古力味, 雖然是凍的, 但冰好少, 令原有味道不會流失, 上面有些可可粉加強口感, 朱古力控一定鍾意.
一間去完會記得嘅cafe, 值得推薦.
世紀士多 (高質&抵食之選)
鮮榨椰汁
你會見到店主即場砍開椰子, 即榨成汁
我覺得這是全世界最好飲嘅椰子汁, 尤其在炎炎夏日, 凍冰冰嘅椰汁, 好爽! 這是我由細飲到大的飲品!
冰涼嘅椰汁, 非常"杰"身, 飲落去有超豐富嘅椰子味, 極新鮮! 飲完一杯, 一世都離不開這小店了, 原來世紀士多嘅名是這樣來的.
譽麵坊 (高質之選)
每晚都有人在外面等位, 加上行過一定香噴噴, 好吸引, 原來土瓜灣街頭巷尾無人不識, 又一間隱世小店, 所以決定一試
南乳雞球
外層炸得好香脆但內層仍好juicy, 雞是用南乳醃的, 味道好香, 外面傳來的香味就是由這種味, 都正常, 因為每台客人都必定Order這炸雞, 你就會知有幾好食.
豬手牛筋撈粗
牛筋都好冧好入味, 好膠質, 出色, 粗麵個汁甜甜哋, 配合豬手牛筋, 好得. 而豬手其實都唔錯, 不過對比起牛筋就失色了.
蝦記麵廠 (抵食之選)
蝦記麵廠已經有50年歷史, 是土瓜灣嘅老字號店舖, 有人說過這裡可以買到全香港最好味嘅蝦子麵. (我未試過, 因對蝦子麵興趣不大).
除了多款出名嘅蝦子麵, 亦有全蛋麵, 魚蓉麵, 菠菜麵...也有燒賣, 腸粉, 粉果等小食, 係好多土瓜灣人由細食到大的,
腸粉
有好多人話佢嘅腸粉重米味, 我覺得腸粉算滑, 好鍾意佢哋嘅醬汁, 甜豉油及麻醬味道剛好, 不會過鹹或過甜. (有些腸粉食完會好口喝)
上海美華菜館 (高質之選)
是一間老店, 食品全是正宗老上海菜式, 包括咸豆槳, 粢飯, 厚蔥油餅, 炸銀絲卷, 油豆腐粉絲湯...
這裡的招牌菜是正宗上海早餐
蔥油厚餅
這個厚蔥油餅真係好少地方有得食
(以前小時候經常食土瓜灣道嘅"貴記", 又平又好食, 可惜已結業多年)
香蔥味濃, 厚度適中, 口感十足, 可惜幾油, 澱粉質較多, 食落都幾膩
蔥油薄餅
薄的軟糯煙韌，油份比厚的還多, 但因份量比較細, 食晒到唔油膩, 反而口腔滿滿蔥油香味, 質感比厚的好.
鍋貼
傳統嘅上海鍋貼一定是皮厚的, 你可以見到, 皮的表面仍是濕潤的, 裡面有肉汁, 這就是傳統的味道了
飯團糯米煙韌, 餡料十足, 油炸鬼是脆口的, 加上甜甜哋嘅炸菜及肉鬆, 口感豐富!
總括來說, 食物水準是好幾好的, 但老闆嘅服務態度就...(反而員工態度比老闆好). 與一些親切嘅店舖老闆相比, 令食客有天壤之別嘅感覺, 有時出街食飯, 唔單只食食物質素, 食得開心反而係最重要的.
耀成茶餐廳 (可以一試)
入到茶餐廳嘅覺得老闆非常親切, 有禮貌, 與食客有傾有講, 亦有賓至如歸嘅感覺, 好舒服!
而招牌食物, 就是沙爹牛肉撈通, 雖然是好普通嘅食物, 但又真的未試過這樣食, 所以要試吓
個人覺得撈通比湯通更好味(尤其夏天)，因沙嗲不會被湯溝淡, 令人覺得沙嗲汁更杰身, 味道更濃; 牛肉頗多, 好腍, 欣賞！
垣記雞蛋卷 (高質之選)
垣記已有五十多年歷史, 只是售買雞蛋卷和鳳凰卷, 蛋卷都是全手工製作, 堅持以明火(慢火)煎烘蛋卷, 佢哋話效果更香脆.
星期六14:30去到, 居然全部沽清, 老闆說今朝12點已經售罄, 叫我下次早點來, 但他是開11時的, 太誇張了！
不過之前已經食過, 印象中佢哋嘅雞蛋卷鬆脆, 而味道偏甜.
星期日13:30再去到, 結果真的售罄, 如果想買, 真係要早點了.
楊成美食 (抵食之選)
是另一間賣糕點的小店, 有黑/白芝麻糕, 馬蹄糕, 紅豆糕, 桂花糕...及客家糕點雞屎藤和艾果, 價錢平易, 佢哋嘅包點, 豆漿及豆腐花是好多人買的.
因未食過雞屎藤和艾果, 因雞屎藤已售罄, 就買了艾果試吓.
艾果
全名是艾葉米果, 一般是清明節吃, 所以又稱清明果. 葉子表面是綠色的, 有獨特香氣 (像跌打酒味).
這艾果外層糯軟, 裡面是花生和椰蓉, 有D甜, 可能是中和艾草嘅跌打酒味, 雖然外表一點也不吸引, 但比我想像中好食得多. (可能因為綠色, 幻想味道似吃草)
佢哋D糕點, 包點, 豆漿及豆腐花在晚上7點前都差不多賣晒, 所以應有一定水準, 而性價比高.
珍寶豆漿餃子 (高質&抵食之選)
就在豆漿王阿媽對面, 是地方細細的小店, 開了大概數年.
韭菜豬肉餃
即叫即煎，大概要等5分鐘，煎到金黃色，非常香口，皮薄餡料十足，感覺上豬肉比韭菜還多，不過仍然很香韭菜味，好juicy, 調味亦剛好，唔錯。
（在等候時，有好多人買生的餃子回家）
永豐食品 (抵食之選)
永豐食品有自己的工場, 主要是做批發及零售.
零售方面除咗各款丸類外, 還有即食魚肉燒賣, 豬肉燒賣, 牛肉及魚蛋, 每款價錢相當便宜
真的好大粒, 而且居然是$1一粒.(這張相的燒賣是未加豉油的, 所以賣相未夠吸引)
豬肉燒賣有香菇粒, 肉質有豬味, 但未有彈牙, 不過1元1粒都已經超晒值. 而魚肉燒賣亦有魚肉味, 不過應該加了粉, 但仍抵食.
興興餃子館 (高質&抵食之選)
牛肉饀餅
當我order牛肉餡餅時, 店生拿出已經揉好的麵粉糰出來, 開始用麵棍把麵粉糰壓成餅皮, 再去雪櫃拿出預先準備好的牛肉餡料放在餅平上, 好有心機地做好了整個牛肉餡餅, 攞去慢煎, 店主說要慢慢煎才好吃, 不能急, 整個餡餅亦不能預先做定, 因質素會不好. 全個過程大槪20分鐘.
太認真了. 冇想過一間小小的店子, 做食物會如此認真.
剛做好的餡餅，上下餅皮也煎得非常香脆，香噴噴的拿出來, 未食都已經滿分了.
外層香脆, 皮是比較厚的, 因為這樣厚才能煎得兩面都香脆無比，而裏面不算是爆餡, 但很Juice, 瀑汁的 (好在不是現場食, 否則一定燙口), 牛肉加上洋葱用了香料腌製，好好味，整體非常高質.
好一間不起眼的北方餃子小店, 製作認真, 從不馬虎, 令我好想試其他食物, 例如各款餃子, 蒜泥白肉, 南瓜煎餅, 雞絲拌麵,炸醬麵, 涼拌大拉皮, 涼拌土豆絲, 蔥油餅, 自家製豆漿...
下次一定再試, 不過都係帶走, 因小店冷氣不足, 而且真的很小.
*********
因土瓜灣實在太多美食, 所以好快會有Part 2, 會更精彩:)
沒有留言:
張貼留言